1Pe 5 | NAS | STEP | Teeꞌkoo diiꞌ dootuuꞌkoo urantanuka tasiꞌantarampimang nkorariainaꞌ ninge diiꞌ ninka nariꞌ oroꞌke dootuuꞌkoo urantai, ninge eeꞌnara Karistooꞌ bakaang baike koontoꞌ ooamira siraꞌpamaunge, eeꞌnoko napoꞌ teeꞌ nariꞌ diiꞌ ninka kompampainge tee meenasi Karistooꞌ bakaang oroꞌantavuainang.

1 Peter 5

Teinge Dootuuꞌkoo Pankenge Tampaꞌ Tanatavaariai Kumponing Bakanaving

1 Teeꞌkoo diiꞌ dootuuꞌkoo urantanuka tasiꞌantarampimang nkorariainaꞌ ninge diiꞌ ninka nariꞌ oroꞌke dootuuꞌkoo urantai, ninge eeꞌnara Karistooꞌ bakaang baike koontoꞌ ooamira siraꞌpamaunge, eeꞌnoko napoꞌ teeꞌ nariꞌ diiꞌ ninka kompampainge tee meenasi Karistooꞌ bakaang oroꞌantavuainang. 2 Aaꞌdampimang: Kumponing bakanavitu tampaꞌ tanataverererimaatoai teing diiꞌke tanata-koo siꞌduruꞌning, tamung konteroritaaꞌ deeaꞌ, teka pia-ita nkoveriai Kumponinge piavomanaꞌ. Mooꞌ narung noruꞌeri tanataverereriaukaꞌ, teka arooꞌketa tanataverereriai. 3 Apoapooꞌerereriaukaꞌ teing tanataverererimaing teka tampaꞌ ooraari siontaariainaꞌ nkorariai. 4 Eeꞌnoko tenang tee Tanatanara Pankaing oroꞌparavainang diiꞌke mooꞌ tee meenasi-poꞌnung paaꞌaravaukaꞌnung nkaveriaing. 5 Eeꞌnoko diiꞌ napoꞌ nemaaꞌ teie diikaning urantanuka-koo boong otorimaatoai amaiaaꞌdori diiꞌka-koo meuꞌke, aiꞌ Daari Meekunge eeꞌ minkuvui otong:

Kumponinge tee teing biiꞌka daangamparimaing tooꞌdempurima teing boonko noruꞌarimaing avusiroꞌari pakuvurikooꞌ.
(Mirumiruꞌ 3:34)

Boonkomariri oꞌnorimaatoai Kumponing Bakaang Tankaꞌkoo Oꞌnori

6 Boonkorariri otorimaatoai diiꞌka-koo tee-koo Kumponing-koo tankaꞌ purintoꞌkoo kuung otori, tee batei makotuko tee deto siꞌduriaing diiꞌ. 7 Diikaang ookara mankiꞌnanka tee narung-koo siperimaatoai, aiꞌ diiꞌ teing teie piaaruri tanataruri otong. 8 Teka tanatarariri eeꞌnoko tarerariri otorimaatoai. Tee diikaang karenung Sietaniꞌ tee laioni-pinaꞌ kururuuꞌkuma avitoitoi nanumaung besiꞌuma naning avoroꞌantavura dunkumpuaing. 9 Tankaꞌniꞌperiai tee diikaang masikaꞌanta-koo eꞌmaniri, eeꞌ noruꞌerima Karistooꞌkoo niiꞌmaikororiꞌ teeꞌ nariꞌ sisikeera kuneꞌaama Sietaniꞌ bakaang avoroꞌanta dimpaꞌaakooꞌ. 10 Aꞌnooꞌ okiꞌning batei-koo sisikeera toraꞌperiaing. Teketa teie Kumponinge piaa baukoi baka unaa-antarurira eeꞌnoko eꞌmang-antarurira puring-antaruriaing diiꞌ, aiꞌ teie tero bokururuꞌnung diiꞌke domaang oparavaung meenasi-poꞌnung nkaveriiꞌnaang Karistooꞌkoo kuunge. 11 Tee tee teeꞌ nariꞌ tanatavari otoaing ootukunung batei-koo oꞌdomaropa-koo. Masikung.

Siꞌnaraꞌnaare

12 Aung aneꞌ karavoto~ apukaneꞌ ninge minkuanko Sivanusie pakumui daarivuing, teie mmaikoꞌke ninge masikaꞌantavamaunge, diiꞌ puring-anta-koo eeꞌnoko aung tee Kumponing bakaang piaa diiꞌkoo siraꞌanta-koo. Eeꞌnung-koo purintariri otoriaing.

13 Aing dootuuꞌnupoong Karistooꞌnavitu anke Babiloniꞌke oꞌnorimanavitue, Kumponinge diiꞌpinaꞌ nariꞌ miruꞌmuruꞌnavitue tampara tampampimaang diiꞌkoo, tee ninka nnuring tampamaung ninka Maakaꞌ ninka nariꞌ. Onkeonkeꞌdeeriai diiꞌ narunaꞌ narunaꞌ piaa taaꞌniꞌantaveri. 14 Mooa tee diiꞌkoo ookara-koo teeꞌ nariꞌ otoaing diiꞌkoo Karistooꞌkoo otorining-koo. Teeꞌ nariꞌ.